Den un video ku mi a graba algun luna pasá m'a bisa un frase ku ultimo tempu mi a keda pensa hopi riba dje.
Nó ta e sirkumstansia ta defini bo pero bo desishonnan t'é kos.
Tin diferente similaridat entre loke ma pasa aden despues di mi aksidente ku e temporada aki di COVID-19 ku por sirbi komo inspirashon ku e temporada aki por laga abo tambe sali mas fuerte pa dilanti.
E loke a pone mi kai flòw bou di stür i kousa mi aksidente tabata un kos chiki ku a kousa hinter mi kurpa keda paralisá kompletu pa un temporada. Similar na e virus ku a kousa e pandemia ku a paralisá hinter mundu pa un temporada.
Mi no por a sali bai tur kaminda despues ku mi tabata bèk na kas dor ku nos kier a evitá huma i otro risikonan pa ku mi situashon ku halamentu di rosea, similar na e medidanan di distansia sosial pa evitá kontagio di e virus.
Tin un dicho ta bisa ku loke no mata bo ta hasi bo mas fuerte. E dicho ei ta bèrdat pero mas fasil pa bis'é ku bib'é.
Pesei mi kier a pensa tòg kiko por ta ehèmpelnan ku por mustra kon nos por sali mas fuerte for di e temporada aki.
Saka un lès afó
Tin un kos mas ku mi a realisá ku mi sa bisa regular.
Logra mira algu positivo den kada situashon ta un abilidat ku bo por desaroyá i bira bon den dje.
Ora nos wak bèk riba e dianan di lockdown nos a bin rekonosé e balor di medikonan, hendenan di limpiesa, enfermeranan ètc. Esei ta lagami pensa ken mas nos tin den nos bida ku nos no a logra mira nan balor den nos bida. Sea ku ta bo bisiña, esun ku sa entregá kos na bo trabou, esunnan ku ta dediká na kuido di naturalesa, i hopi otro mas.
Asta e libertat ku nos a kustumá kuné pa sali tur dia hasi lokual ku nos ke i kumplí ku nos kompromisonan. Dor ku e ta mustra algu asina normal di tur dia, ta fasil pa menospresia e libertad ei. Dor di ta gradesido pa e hendenan i e oportunidatnan aki e ta yuda nos rekonosé mas lihe ainda e otro personanan i eksperensianan pa ta gradesido p'é.
Ku asta ami mes ta konsiente ku ta algu ku te ainda mi ke ta miho den dje. Rekonose otronan, apresiá i ta gradesido pa e eksperensia i oportunidatnan ku ta presentá den bida.
Nos mester a adaptá
Ora e lockdown a presentá tatin hopi hende ku a haña nan ta bira kreativo. Mester a adaptá pa por a sigui biba i kumpli ku otronan. Sea ku ta dor di siña kushiná, siña traha ku aplikashonnan ònline, disiplina den orarionan di kosnan di hasi i diferente kos mas. No ta nifiká ku e tabata fasil ni ku tur hende a logra yega na un solushon pa tur e difikultadnan ku a presentá pero e ta hasi nos konsiente si ku nos por. Ku nos komo hende tin den nos e loke mester pa nos sobrebibí. Kosnan ku aña pasá nos a pensa ku lo tabata un meta imposibel òf muchu leu, a mustra ku nos por a alkansá tòg.
Asta ami tabata pensa algun luna pasá ku min ta kere lo mi por a logra pasa 2 luna sin kome na un restaurant òf sin bestèl un kuminda. Awor aki obligatoriamente m'a hañami ta hasi’é. Ela lagami realisá un kos si. Ela ponemi bira konsiente si ku no ta paso bo ta kome na kas, ta nifiká ku bo ta kome mas salú. Segunmi tin dia kos a sali foi man komiendo na kas mes.
Mi ta sinti ku ainda lo bai tin mas reto nos dilanti paso ta esei ta e bunita di bida pero e loke nos a eksperensia te ku awor den e ultimo 2 lunanan lo bai keda komo algu grandi di nos historia. Tin un dicho di Albert Einstein ku ta bisa
E mente ku habri pa ideanan nobo, nunka lo regresá bèk na su tamaño original
Esei ta konta tambe ku kada eksperensia. Pues kada dia nos ta pensa sierto kosnan nobo, eksperensiá kosnan nobo ku nunka ta laga nos mente regresá na su manera òf tradishonnan di pasado. Nos por skohe di tuma e mesun akshon pero enrealidat kada dia nobo nos ta un stap mas dilanti. Sea e stap ei ta mas den e direkshon ku ta duna nos satisfakshon òf e ta un stap ku ta distansiando nos mas for di loke ta duna nos satisfakshon.
Kiermen alfinal di dia apesar di loke pasa rondo di bo, bo eskoho ta algu signifikante. E temporada aki a sirbi komo un oportunidat pa bo por sigui tuma e desishon ku ta duna bo satisfakshon i mi ta konfia ku esei a sosodé pa abo tambe.
Comments